حقق أحلامك على طريقة أنا موش قصير أوزعة أنا طويل وأهبل..!!

Admin

أثناء

حقق أحلامك على طريقة أنا موش قصير أوزعة أنا طويل وأهبل..!! Ev8imv

تجولي فى محطة الرمل با لإسكندرية لاحظت عند أحد باعة الكتب اللى مليانين المنطقة هناك كتاب صغير مكتوب عليه بالانجليزية (The secret) وهو كتاب صغير الحجم سألت عنه قالى البائع ده بــ 60 جنيه ، فإستغربت يعنى كتاب صغير زى ده إزاي يعنى يكون بــ 60 جنيه ولأني موش حدقع الملبغ ده فى كتاب لا أعرف عنه أى شىء مقدما بغض النظر إذا كان كبير أو صغير ، فقررت أنى ابحث عنه على الأنترنت وبعد جهد جهيد حملت الكتاب بصورة PDF وأخدت كل يوم أقرالى خمس صفحات وبعد أن إنتهيت من الكتاب عرفت من الإنترنت برضه أن الكتاب ده ( من أكتر الكتب مبيعات فى العالم ) و ( أن هذا الكتاب حيغير حياتك ) فقولت علشان كده كان الكتاب غالى فوق تكلفته كعادة يعنى اى حاجه فى البلد عليها إقبال ترتفع عن سعرها الاصلي زى القناع البلاستك اللى إرتفع سعره من 8 جنيه إلى 40 جنيه لمجرد ان وزير الصحة نصح بيه .
حقق أحلامك على طريقة أنا موش قصير أوزعة أنا طويل وأهبل..!! 2a4oaxs

حقق أحلامك على طريقة أنا موش قصير أوزعة أنا طويل وأهبل..!! 2a4oaxs

المهم أني بعد أن قرأت الكتاب وجدت أنه كتاب عادي لا يستحق كل الهوليلة المعمولة حواليه فقررت إنى أنقد فكرته العامة ، ولك الأن أن تسألنى إنت بتنتقده علشان بـ 60 جنيه ولا لأن المادة العلمية بتاعته نص كوم ؟! .. أقولك يا خويا .. أنا إتعلمت من كتر شحطتى وراء الكتب فى المكتبات وعند بتوع الكتب القديمة اللى خلصت طبعتها أن السعر فى الكتب موش مهم طالما الكتاب مادته العلمية جامدة ، والكتاب اللى بين إدينا وهو كتاب ( السر ) كتاب تعبان تعب جامد .. فهو يلعب على وتر الاماني والاحلام عند الناس فى وقت زاد الاكتئاب فيه حتى ضرب بجذوره فى معاميق معاميق النفس البشرية .. ولو إتبع الكتاب أسلوب تربوي ونفسي معين للحاجه دي لقولنا إشطة الكلام وبها ونعمت .. ولكن الكتاب لعب على الهلاوس والخرافات ..فتدور فكرته الأساسية إنك يا (ابو سريع) عايز تبقى غني ومشهور ؟! عايز يا (ابو سريع) يكون عندك عربية ؟! .. عايز يا (ابو سريع) تحقق أى حلم من أحلامك ؟! .. متقلقش يا (ابو سريع) أنا موش حطالب أنك تشتغل ولا تجتهد ! أنا بس حطالب أنك تؤمن بالسر ..!!
حقق أحلامك على طريقة أنا موش قصير أوزعة أنا طويل وأهبل..!! 2a4oaxs

طب إيه السر ده ؟!.. إنك تؤمن بنظرية مفتكسة إسمها ( قانون الجذب ) يعنى مخك حيجذب الاماني اللى أنت عايز تحققها وحتحقق .. وهكذا.. كده من الهواء .. حتحقق الأماني فقط لأنك مؤمن بقانون الجذب على طريقة ( قول يا باسط تلاقيها هاصت ) وعلشان كده تلاقى مؤلفة الكتاب وإسمها على فكرة (روندا بايرن).. تقولك أوعي يا (ابو سريع) تعتقد أن الافراط فى الأكل يسبب السمنة لو إنت إعتقدت هذا فإنك مخطىء فالسمنة تأتيك فقط إذا فكرت فيها سواء أكلت ولا لأ!! .. وهكذا كلام تهجيص وأعتقد أن (عبد المنعم مدبولي) سبقها فى الحكاية دى لما حب يعالج الراجل القصير قاله بص ردد طول ما انت ماشى وقاعد جملة ( أنا موش طويل واهبل أنا قصير أوزعة ) .
حقق أحلامك على طريقة أنا موش قصير أوزعة أنا طويل وأهبل..!! 2a4oaxs

حاجه غريبة يعنى زمان كنا بنقول ان الخرافات بتنتشر بسبب الجهل دلوقت الخرافات بتنتشر وهم ملبسنها ومزوقنها بثوب النظريات العلمية ويألفوا فيها الكتب كمان ..وإذا كان الكلام كما تقول الست (روندا بايرن) بقانون الجذب لكانت الامور كلها فلة شمعة منورة .. فالطالب يقول يا جماعة أنا موش مذاكر لأنى (حنجح .. حنجح ..حنجح ) ويجذب النجاح بأه بقانون الجذب ده المزعوم .. ناهيك عن إن الكتاب يقوم بتضخيم الذات بشكل مبالغ فيه فكما إنه نفي فكرة الاخد بالاسباب ، كمان نفى فكرة التوكل على الله فهى تقول بالانجليزية :
So we are the creators not only of own destiny but ultimately we are the creators of Universal destiny
والترجمة للجماعة للى ثقفتهم فرنساوي ( إذن نحن الخالقون ، ليس لقدرنا فحسب ، بل نحن الخالقون لقدر الكون) .. فإذا كان الكلام ده موش غريب على مفكرين الغرب اللسعين اساسا ولكنه غريب على المسلمين وعلى عقائدهم والخطورة إن الكتاب رائج ومنتشر ومحدش واخد باله من الأفكار دي ، ولأن الافكار دي منيلة بنيلة فمترجم الكتاب إتكسف على دمه يترجمة الجملة دي كده كما هي فى النسخة الأنجليزية فخدع الناس وترجمها بمزاجه فقال ( قانون الجذب هو قانون العمل ) .
حقق أحلامك على طريقة أنا موش قصير أوزعة أنا طويل وأهبل..!! 2a4oaxs

بعض الناس إنجذبت لهذا الكتاب لأنها محبطة وظنت إن الكتاب ده بيدعو للتفكير الايجابي والتفائل وهو على عكس كده تماما ، فأنا موش ضد التفائل ولكن ضد التواكل ، فالتفائل الباعث على العمل هو التفاعل الإيجابي فى التفكير ولكن كتاب السر لم يدعوا مطلقا للعمل الايجابي ولكنه دعى إلى الخمول ممنيا نفسك باحلام وهمية حتتحقق وانت بتاكل بيتزا مع واحدة كانز قدام التليفزيون ، وصدق الفاروق عمر بن الخطاب ( إعملوا فإن السماء لا تمطر ذهبا ولا فضة ) ، فجملة الفاروق دى يتألف فيها كتاب للعمل والجدية ، أما كتاب السر محصلش حتى بطن الزير .

» طريقة الرفع على Archive
» موضوع: شرح طريقة عمل منتدى في بي VPمجاني
» شرح طريقة كيف تصنع برنامج بورتبل
» شرح طريقة عمل الاسكرين شوت من الفيلم بكل سهولة
» شرح طريقة كتابة الموضوع فى الموقع